27 Սեպտեմբեր 2026-ին, 115 հոգի հաւաքուեցաւ Թորոնթոյի Լարազ Ճաշարանին մէջ՝ մասնակցելու Գանատայի Հայ Աւետարանչական Ընկերակցութեան (ԳՀԱԸ) Հանգանակային Ճաշկերոյթին։ Երեկոն առիթ մըն էր ընկերային հանդիպումի, երաժշտութեան, երախտագիտութեան եւ Լիբանանի Հայ Աւետարանական վարժարաններուն աջակցելու յանձնառութեան։
Հանգանակային Ճաշկերոյթը ընդգծեց այս վարժարաններուն կենսական դերը՝ երեխաներուն որակեալ կրթութիւն տրամադրելու եւ միաժամանակ անոնց քրիստոնէական հաւատքն ու հայ ինքնութիւնը սնուցանելու գործին մէջ, մանաւանդ այնպիսի ժամանակաշրջանի մը, երբ Լիբանանի մէջ բազմաթիւ ընտանիքներ կը դիմագրաւեն տնտեսական լուրջ դժուարութիւններ։
Կրթութիւն, որ կեանքեր կը փոխէ
Երեկոյի գլխաւոր բանախօսն էր Լիբանանի Շամլեան-Թաթիկեան Հայ Աւետարանական վարժարանի փոխ-տնօրէն եւ Նոր Մարաշի Հայ Աւետարանական եկեղեցւոյ հովիւ Վեր. Րաֆֆի Մսըրլեանը։ Վերապատուելին մեծ ոգեւորութեամբ անդրադարձաւ այն կարեւոր փոփոխութիւններուն, որոնք հնարաւոր կը դառնան վարժարանի աշակերտներուն կեանքին մէջ ԱՀԱԸ-ի (AMAA) ու ԳՀԱԸ-ի (AMAC) նուիրատուներու աջակցութեան շնորհիւ։
Շամլեան-Թաթիկեան վարժարանը աւելի քան 90 տարիներէ ի վեր կը ծառայէ հայ համայնքին։ Գտնուելով Պուրճ Համուտի նիւթապէս դժուար կացութեան մէջ եղող շրջանին մէջ՝ վարժարանը իր դռները կը բանայ այնպիսի ընտանիքներու երեխաներուն առջեւ, որոնք յաճախ ի վիճակի չեն ամբողջութեամբ հոգալու ուսման վարձքը։ ԱՀԱԸ-ի եւ ԳՀԱԸ-ի աջակիցներուն առատաձեռնութեան շնորհիւ՝ վարժարանը կրնայ այս երեխաներուն տալ արժէքաւոր կրթութիւն ստանալու հնարաւորութիւնը։
Վեր. Մսըրլեան պատմեց քանի մը յուզիչ օրինակներ այն երեխաներուն մասին, որոնք շատ դժուար պայմաններէ եկած են եւ, հակառակ բոլոր դժուարութիւններուն, այսօր յաջողութիւններ կ՚արձանագրեն։ Անոնց պատմութիւնները ցոյց տուին, թէ ի՛նչ կարելի է իրագործել, երբ երեխաներուն կը տրուի ոչ միայն բարձրորակ կրթութիւն, այլեւ վարժարանին յատուկ ջերմութիւնը, հոգատարութիւնը եւ քրիստոնէական միջավայրը։
Ներկաներէն շատերուն համար այս պատգամը յատկապէս իմաստալից էր։ Շամլեան-Թաթիկեան վարժարանի նախկին աշակերտներ եւ ուսուցիչներ եւս ներկայ էին Ճաշկերոյթին՝ ստեղծելով կենդանի կապ մը Լիբանանի մէջ վարժարանին երկարամեայ ծառայութեան եւ Թորոնթոյի մէջ համախմբուած համայնքին միջեւ։
Երաժշտութեան, տօնակատարութեան եւ գնահատանքի երեկոյ մը
Ծրագիրը վարպետօրէն վարեցին Տիկին Զէլա Սարմազեան-Գագուսեան եւ Պրն. Րեմի Կրկէս, որոնց տպաւորիչ ելոյթները, ջերմութիւնն ու աշխոյժ ներկայութիւնը յատուկ մթնոլորտ ստեղծեցին երեկոյի ամբողջ ընթացքին։
Երեկոյին մաս կազմեցին նաեւ երաժշտական կատարումներ։ Դոկտ. Ռազմիկ Պէպէճեան իր երգեցողութեամբ հմայեց ներկաները, մինչդեռ Rubato String Quartet լարային քառեակը, ընկերակցութեամբ դաշնակահար Սոնա Հովսեփեանի, երեկոն ճոխացուց գեղեցիկ եւ հմայիչ երաժշտական երանգով։ Այս շարքին մէջ տպաւորիչ էր մանաւանդ Շարլ Ազնաւուրի երգերու հիման վրայ ներկայացուած երաժշտական փունջը, որով նուագախումբը արժանացաւ հանդիսատեսներու ոտնկայս ու երկար ծափահարութիւններուն։
Վեր. Րաֆֆի Մսըրլեան իր խորին երախտագիտութիւնը յայտնեց Պրն. Սարգիս Մարանդճեանին, Պրն. Յակոբ Ճանպազեանին եւ Պրն. Յարութ Ատրունիին՝ Շամլեան-Թաթիկեան վարժարանին իրենց նշանակալի ներդրումներուն համար։ Ապա Գանատայի Հ․Ա․Ը․-եան նախագահ Հռութ Տէմիրճեան-Տէնիք եւ Ամերիկայի ՀԱԸ-ի Գանատայի Ներկայացուցիչ Յարութ Ներսէսեան պարգեւատրեալներուն յանձնեցին վարժարանին կողմէ պատրաստուած գնահատանքի յուշանուէրները՝ ի նշան երախտագիտութեան։
Ծառայութիւնը կը շարունակուի
ԳՀԱԸ իր սրտագին երախտագիտութիւնը կը յայտնէ կազմակերպիչ յանձնախումբի անդամներուն, երաժիշտներուն, մասնակիցներուն եւ բոլոր անոնց, որոնք սիրայօժար իրենց բարոյական կամ նիւթական ներդրումով աջակցեցին երեկոյի կայացման։
Երեկոն երախտագիտութիւն մըն էր այն իրագործումներուն, որոնք արդէն կատարուած են, եւ միաժամանակ յիշեցում մը այն մասին, թէ տակաւին որքան բան կարելի է իրագործել, երբ մարդիկ կը համախմբուին եւ կը ներդնեն իրենց միջոցները յաջորդ սերունդին մէջ։
Հանգանակային Ճաշկերոյթը աւարտեցաւ, սակայն կարիքը կը շարունակուի։ Լիբանանի Հայ Աւետարանական վարժարանները կը շարունակեն ծառայել այն երեխաներուն եւ ընտանիքներուն, որոնք կրթական հնարաւորութիւններու, աջակցութեան եւ յոյսի կարիք ունին։
Իւրաքանչիւր նուիրատուութիւն կ՚օգնէ, որ այս վարժարանները պահպանեն իրենց ամրութիւնը եւ շարունակեն ստեղծել այնպիսի միջավայր մը, ուր հաւատքը, կրթութիւնը եւ հայ ինքնութիւնը միասին կը սնուցուին։
Նուիրատուութիւն կատարելու համար հաճեցէք սեղմել այստեղ:
